mentre, si el fosse de necesso, che i gastaldi sia tegnudi de guardar la soa volta chomo i altri; e si algun de quelli comandadi non volesse andar, truova uno suficiente che vada per lay, e quello pagarlo del so; e sia tegnudi de lavarlo e portarlo ala sepoltura e metter lo confalon in piaça dreto dove serà quel corpo, e in giexia chadaun dei fradelli debia aver una chandella impiada in man de quelle dela scuola, e dirli XXV pater nostri e XXV ave marie per anima soa, e che innanci che passa oto dì da può ch'el serà sopelido, i gastaldi debia far dir una messa a l'altar dela dita scuola per anema soa e dei fradelli pasadi de questa vita e de ser Marin dala Salsa; e lo dì innanci che la sia dita, i gastaldi debia comandar a tuti i fradeli che sia a quella messa, e con devucion dir XXV pater nostri e XXV ave marie per l'anima de quel corpo morto; e quando se leverà el nostro signor Yhesum Christo aver una chandela impiada de quelle della scuola in man de chadaun dei fradelli, e pregarlo devotamentre ch'el dia paradixo a quel'anima e de tuti i fradelli passadi de questa vita e a l'anima de ser Maria dala Salsa.
Anchora volemo che chadaun che vuolla liorar de l'arte, over far l'arte, debia intrar in la dita scuola e pagar soldi X per quel intrar, e s'el può provar ch'el pare o fradello sia stado in la dita scuola, non debia pagar più chomo paga quelli che è in la dita scuola, e questo iera in la mariegola vechia scrito; e se algun de quelli che lavora del dito mestiero non volese intrar in la dita scuola per tristicia o per puocha bontà, algun maistro non i debia dar da lavorar; e se el maistro non volese intrar, simelmentre el lavorente non debia lavorar con quel maistro, e tegnirlo vile e de puocha bontà.
Ancora volemo che sia obligadi sì lavorenti chomo maistri che lavora in una staçon, se lo maistro volese dar combiado alo lavorente, ch'el debia dir a quello lavorente; truovate inviamento, che mi non te posso dar più da lavorar: e quel maistro sia tegnudo de dar da lavorar a
