XXXIV.
LE ÇENARI
A la Signorina Berenice Monti.
Mi gera ancora in domino; e a San Lio
Un campanelo sento far: drlin, drlin!
E vedo un prete co la zente a drio
Che portava el Signor a un povarin...
Mi, me fermo e saludo; un arlechin,
Che 'l gera ancora in mascara vestìo,
El se ferma anca lu, el se tira indrìo
E 'l saluda co in man el capelin.
I gera propio apena passai via
Che i xe andai drento tuti de 'na porta...
― «Ah, (ziga l'arlechin), a casa mia!...»
E su anca lu. Domando a uno de scorta:
― «Chi xelo l'amalà?» - »Credo che sia
La mama de arlechin!...» (E la xe morta)!
