Un poco el xe restà sora pensier
Vardando mi, che stava co le man
Pusae sul remo come un gondolier;
Po', dando un sospiron, povaro can,
El me gà dito: — «Si l'amava, e tanto:
Ma, per l'amor de Dio, parlemo pian.
Se ti savessi, zovenoto, quanto
Gò soferto per ela... per so amor
Più che per tuti i mii dolor gò pianto!
E qualo xelo el mal, qualo el dolor,
Dime ti, che ne fazza più patir
De le tremende malatie del cuor?
Quando pensava de dover morir
E lassarla ela sola quà in sto mondo,
No lo podeva sto pensier sofrir!
E de note là zò nel più profondo
Pozzo scavà soto acqua, quando gera
Indormenzà, quel'anzoleto biondo
El me diseva: Su, coragio, spera:
So' l'Inocenza, finirà ogni pena...
E mi me alzava su la freda piera.
El sangue me bogiva in ogni vena:
Chi xestu? domandava; ascolta!... (Ascolta?
No gera inveçe el son de la caena)!...
Maledeto quel fòdaro, e la volta
Che lo go tolto suso, e maledeta
La giustizia del Mondo cussì stolta!
Dise un proverbio: Chi la fà, l'aspeta;
E Venezia andarà sempre in malora
Fin che el mio sangue çigarà vendeta...»
