Sta pagina la xe stà trascrita, ma la gà ancora da vegner rileta.
XIII.
IN MEMORIA
DE
GIAÇINTO GALINA E GIACOMO FAVRETO
Se mi fosse un Plutarco voria farve
'Na biografia fra i omeni imortai;
Se un Rafaelo fusse, ritratarve
Sora 'na tela tuti do tacai;
Ma za che un magro poetazzo son
No ve posso cantar che sta canzon.
El scarpelo e la pena coi penei
Xe sempre andai d'acordo fra de lori,
Tanto che dir se podaria fradei
I scultori e i poeti coi pitori,
E vèdarlo ben pol quei che ama l'Arte
Sui marmi, su le tele e su le carte.
La storia, fra i più grandi e megio fioi
Che sta gran Mare, degna dei romani,
A l'Italia gà da fra artisti e eroi:
Sarpi, Goldoni, Dandolo, Pisani,
Bembo, Gozi, Manin e Tintoreto,
Anca Galina metarà e Favreto.