Col penelo uno, e st'altro co la pena
Gavè i costumi veneziani impressi
Cussì ben su la tela e su la sena
Che gavè vinto i originai stessi,
I veri originai che tuto el zorno
Se incontra andando per Venezia intorno.
Ti po ti xe, mio povaro Giacinto,
Ben degno de Goldoni çitadin,
Che se no ti lo gà del tuto vinto,
Indrio no ti ghe resti, anzi viçin
De lu ti cori, ma co tanta briva
Che vèdar no se pol chi primo ariva.
E indove mai trovar se podaria
Comedie come queste: Serenissima,
Fora del Mondo, I oci del cuor, Mia fia,
E quela più che bela, arçibelissima,
Le barufe in famegia, e La Famegia
In rovina, che xe 'na maravegia?
E l'Amor in paruca? E de la Nona
El moroso? che gera, xe e sarà
El più bel fior de quela gran corona
Che a Venezia e a l'Italia ti gà dà?
E quel'altra che prima de morir
Ti gà scrito pensando a l'avenir?
Quela Base de tuto, che de tute
Forsi la base xe, (secondo mi),
E po' ti xe andà là in mezo a le mute
Tombe de San Micel, viçin a chi
Se in vita e in arte te xe stà fradelo,
In morte e in gloria te sarà zemelo.
