XLV.
LA PRUÇISSION DEL CRISTO
(A CANNAREGIO)
In-te-la Cesa de San Geremia
Ghe xe, viçin l'altar magior, un Cristo;
No ste creder che diga 'na busia
Che i veneziani tuti lo gà visto,
Co la so brava barba e i cavei longhi
Che ogni tanti ani i cresse come i fonghi.
Ghe xe chi dise che i sia propio veri;
Ma za crede a le ciacole dei tondi!
E come xela che i xe tuti neri
Se Gesù Cristo li gaveva biondi?
El fato sta che no se pol trovar
Barbier che possa fàrgheli, o scurtar.
