Intanto el nostro popolin del tardi
Crede co gran delizia del piovan,
Che 'l se la ride, e 'l tira i so lombardi,
E 'l se n'infis'cia del rispeto uman,
E de la lege che, carga de mufa,
Senza voler protege sta gran trufa.
Za come el sol la xe 'na roba vecia
Che tuti tira l'aqua al so mulin;
I preti e i siori i magna in-t'una tecia,
E 'l pesse grosso magna el pichenin:
Tuti se rangia ancùo, tangaro chi
Se fa imbrogiar de note e anca de dì.
Se dovesse i miracoli contarve
Che fa sto Cristo, me vorìa un messal;
Ma, avendo gran paura de stufarve
Co robe che no gà pèvare e sal,
Xe megio che ve diga su a memoria
La dolorosa e comovente storia.
Ma, per contarve ben anca in suçinto
La pruçission del Cristo e la gran festa,
Me vorave del povaro Giaçinto
Che dorme a San Micel, aver la testa;
Alora sì che la farìa da vasco:
Basta, me provaró; ma farò fiasco...
Dopo disnar, quando de roba piene
In panza a tuti le buele tase,
Vestii per ben, co tanto de caene,
Vien fora i çitadini da le case,
E i coverze le Cale in 'na maniera
Che no se vede più piera su piera.
Pagina:Gerani - Poesie veneziane, Venezia, Ferrari, 1903.pdf/124
Sta pagina la xe stà trascrita, ma la gà ancora da vegner rileta.