Un ocio e mezo, (el gera finco), in viso
El me fica per dirme: ― «Venezian?
― «No; (ghe rispondo), mi, so' de Treviso...»
― «E mi che lo credeva padovan...
Me so' sbaglià.» ― «Ben, senti ciò: te aviso
De far vogae longhe, e de andar pian
Ne le voltae, che no ciapemo scosse,
Perchè la mia mu...ger, la gà la tosse.»
― «Gò capio, gò capìo...» Ciapando el remo
Lu me risponde, e la barcheta va...
Mi e la putela intanto se postemo
Soto el felze de seda ricamà.
A Sant'Elena subito voltemo
Lassando indrio Sa' Marco e la Çità;
Cussì semo in-t'un atimo arivai
In mezo a la Laguna... ― «Eco, i cocai!»
Galegiando a fior d'acqua ghe mostrava
I gò, i bisati e qualche passarin;
E, ogni volta che 'l remo sc'iafizava
L'aqua, ghe dava in boca un bel basin.
(El barcariol sentiva, ma lu el fava
Finta de no sentir... Co omo divin!)
E intanto che sul cuor la me strenzeva:
― «Caro el mio cocolon!» La me diseva.
O mia Laguna, bela come el çielo!
Dove se pol trovar la so compagna?
― «Vu altri no savè cossa sia el belo!»
(Me diseva un poeta de campagna),
«No gavè gnanca un fior, gnanca un ozelo,
Nè un campo, un fiume, o un prà, nè una montagna,
Nè alberi, o vache; ma solo aqua e pesse,
Che sie ore la cala e sie la cresse!»
Pagina:Gerani - Poesie veneziane, Venezia, Ferrari, 1903.pdf/110
Sta pagina la xe stà trascrita, ma la gà ancora da vegner rileta.