― «Lassemo andar (ghè gò risposto) i monti,
I campi, i fiumi e st'altre robe là,
Che nu' gavemo çinquecento Ponti
E per andar su e zozo i basta, sa?...
Inquanto al resto po' che ti me conti,
Osei e vache ghe ne xe anca quà;
Ma in mezo ai campi, ai vostri fiori e al verde
De le bisse ghe xe, e po' de le m...
...Ciò Marietina: Sastu che de boto
Sto venteselo me gà fato fame?
Tira fora quel pan che xe in fagoto
Che mi in fete farò sto bel salame.»
― «Eco la bozza.» ― «Tira fora el goto.»
― «Ecolo.» ― «Brava. Quei do vovi dame.»
― «Eheeee, quanta roba!» Chi vol goder goda:
Tanto per no basarse a panza voda!
Ciò, magna sa?» ― «No sta pensar che magno.»
― «Bevi, che dopo, gà da bever lu:
Ciapa, ciò Nane.» ― «Tuto xe guadagno!»
― «Se sta ben coi... françesi?» ― «Ovì, Monsiù!»
― «(Vustu che dopo andemo a far un bagno?»
― «(Anca!)» ― «Zo bevi.» «No, no no bevo più...
Co caldo, Bepi; come che se sùa!»
― «Lèvete el busto...» ― «Se so squasi nùa!...»
― «Varda la luna che vien su da le onde,
Specio d'arzento che se specia el sol,
La par 'na tosa nùa che la se sconde
Nuando, e farse vèdar no la vol;
Eco, col çielo za la se confonde...
Marieta vien... (va pian, ciò, barcariol)!
E intanto che la gondola ninava
Senti sto bogia cossa che 'l cantava:
