XXIX.
IN GONDOLA
(IDILIO LAGUNAR)
A l'amigo A. Della Colletta, pitor.
Stufi de andar su e zo per la Piazzeta
Come do merli in-t'una cheba orbai,
'Na sera che tirava quel'arieta
Che tira sempre per i 'namorai,
Ghe digo a la mia tosa: «Ciò, Marieta.
Vusto che andèmo a vèdar i cocai
Fora in Laguna, a far 'na ziradina?»
— Si, andèmo pur.» La dise. E mi: ― «Camina!»
Sie franchi in gondoleta, i xe ben spesi.
Un barcariol, de quei de San Nicola...
Che 'l ne gaveva tolto per françesi,
El ne ziga: ― «Monsiù, voleu gondòla?»
Mi, che lontan no so 'de sti paesi,
Che gò risposto in venezian: — «Ciò, mola
Per Sant'Andrea, e se ti me servi ben,
Ghe sarà per el musso pagia e fien.»
