A cossa serve un rico patrimonio?
Che val el dominar, el devertirse,
Se in te le case penetra el demonio?
Per non aver un zorno da pentirse,
Sta zentildona piena de virtù
Col santuario l'à volesto unirse.
Chi conversa col mondo in zoventù
Aquista tanti pregiudizi e tanti,
Che in vechiezza impazzisse ancora più.
Fenia l'età de coltivar i amanti,
Vol deventar la dona leterata,
Professori tratando e diletanti;
Ma perchè per sto far no la xe nata,
La se rende ridicola a la zente
Come fa la mia Vedoa Infatuata:
Xe da lodar sta Vergine prudente
Che ai santi studi del divin Vangelo
Aplica con profito el cuor, la mente.
De zoventù no ghe n'importa un pelo;
L'anema è sempre bela, in ogni stato,
Sempre la piase e la xe cara al Cielo.
Se lecito ghe fusse in tel so stato
Lezer qualcossa per divertimento,
El Filosofo Inglese no xe ingrato.
De quando in quando qualche sentimento
La troverìa d'una moral cristiana,
Che darìa compiasenza al so talento.
