Pagina:Collezione delle migliori opere scritte in dialetto veneziano 9.djvu/39

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.



18Lugr. Caspita parlè ben, siora Pasqueta!
     Ste belle cose chi ve l'à insegnae?
     Pasq. Le ò sentie a dir ste cose dal Poeta,
     Mi go bona memoria, e le ò imparae.
     Lugr. Laoreu, frascone, o togio la bacheta?
     Vardèle là, ste misere, incantae.
     Pasq. Chi no s'incanteria, cara Lugrezia?
     Sti novizzi à incantà meza Venezia.

19Lugr. Animo, deghe drio; via da valente,
     Fenimo avanti sera sto laorier.
     Chi no fa presto no vadagna gnente.
     No gh'è più da far ben in sto mistier!
     Ogni dì per Venezia a dir se sente:
     Xe pien de Conzateste ogni Sestier,
     E po per sparagnar quatro gazete,
     Tute fa scufie e tute fa stolete.

20Se in ste ocasion co un poco de giudizio
     No se se fa la ponga, la va mal;
     Cara Pasqueta co sto sposalizio
     Go speranza che femo carneval;
     Inventerò ben mì col mio caprizio
     De le galanterie che poco val;
     Per farme pagar ben za so l'usanza;
     Basta dir, che la moda xe de Franza.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_9.djvu/39&oldid=66783"