Balbettando risponde il gondoliere,
Interrotto dal pianto e dal singhiozzo:
Ah sior sì, ste rason xe sante e vere
Ma no le basta a consolarme un giozzo,
E ste lagreme mie le xe sincere,
E vogio per dolor farghene un pozzo,
Perchè xe vero che l'è viva e sana,
Ma per sempre da nu la sta lontana.
E dasseno, paron, me vien la stizza
Co penso che l'è andada in monistier.
Se l'avesse volsuo farse novizza,
Chi sa che mi no fusse el so provier?
Che gnancora no son vechio panizza,
E so far, co va fato, el mio mistier.
E in t'un gropo a mostrar la mia bravura,
Quando son a dezun no go paura.
Ma pazenzia per mì, che a mantegnirme
Fin che vivo el paron ga da pensar;
Ma de pianzer, per dia, no so tegnirme
Co penso che sta Puta à da penar;
Che no basta, sior no, che i vegna a dirme:
L'à da esser contenta e giubilar.
Dal mondo al monistier gh'è diferenza,
L'à da far sacrifizi e penitenza.
