Pagina:Collezione delle migliori opere scritte in dialetto veneziano 9.djvu/23

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.



Osservano a sonar viole e violini,
     Osservano i sberlefi dei cantanti,
     E vardano quei cari motesini
     Dei zendaeti che se fica avanti.
     Vardano per la Chiesa i lecardini
     Che ga paura de imbratarse i vanti;
     Vardano la Parona che compida,
     Le zentildone al Parlatorio invida.

Vardano adesso el Parlatorio pien
     De dame e cavalieri a marteleto,
     E 'l rinfresco badial che va e che vien
     Dove tanti golosi fa bancheto.
     Vardano adesso Pasqualin che tien
     Anca elo in manina el so sorbeto;
     No miga de naranza o de limon
     Ma de sugo de ùa sincero e bon.

Vardano quel scrocone che à bevù
     Sete sorbeti e cinque chiocolate.
     In quel cantone osservano colù
     Che à impenìo le scarsele, e se la bate.
     Queste ch'è qua, per dirla tra de nu,
     Se ghe dise de posta baronate,
     Se el fusse vin compatirìa l'usanza;
     Ma impenirse de aqua? oh che increanza!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_9.djvu/23&oldid=66770"