Mosse i fili il buon vecchio, e a dir riprese:
Vardano adesso de le cosse tante.
Se cambiano la scena, e quel paese
Che vederano è l'Isola del Zante.
Vardano là quel Cavalier cortese
Mandà da la Republica in Levante.
Vestìo de rosso, oh come ch'el par bon
Zelenza Nicoleto mio paron!
Vederano là suso in quel Castelo
De dì, de note so Zelenza atento;
E vederano la giustizia e 'l zelo,
Come l'à sostenudo el Regimento.
Vardano i Greghi che confessa in elo
Gran saver, gran dolcezza e gran talento.
Vardano adesso quando ch'el va via
Come pianzono tuti in compagnia.
L'Isola se desfanta, e vederano
La cità de Venezia e 'l Lazareto,
Vardano quante gondole che vano
A darghe el ben tornao con vero afeto.
Adesso a quel balcon osserverano
Pasqualin presentarse con respeto,
E sconzurarlo ch'el lo torna a tor
In gondola a servir fina ch'el muor.
