LVIII
In quel che un bocoleto destacava
Un dì la Nina da un roser, vien ponta
In t'un deeto de una man da un'Ava,
4Che per suzzarlo se ghe gera sconta.
Co la ga ben sentìo che ghe brusava,
Inver mi, ohi! ohi! zigando, la cor pronta,
E mentre 'l deo de lagreme la lava
8Del becon e de l'Ava la me conta.
Ma quel, la dise, che stupir me fa
Xe questo, che culìa co la so Coa,
11E no col besevegio m'à becà.
Che maravegie! gh'ò resposto mi;
No ti m'à becà el cuor ti co la toa?
14No ti me 'l bechi tuto el santo dì?
