21Oh con quanta dolcezza i zorni e l'ore
Ne passa insieme! e l'ale amor ghe impresta,
Ne vede el sol, e 'l gode, e in mar el core,
Ma la note vien drio, la note resta:
Che se al to aspeto el nostro mondo more,
E xe natura scolorida e mesta;
Oh note, dei amanti confidente,
Ti ne xe cara, e te godemo arente.
22Cara in quel'ore che lavora Nina,
E i bei dei sul laorier presti la move,
Co interompe el lavoro un'ochiadina
Che tuta dolce sin al sen ne piove,
E quando un'amorosa canzoncina,
In ton la canta ch'el mio cuor comove,
E co amor sconto in la so bruna vesta
Ore più dolci ai nostri afeti impresta:
23Ore più dolci, e cresemae da un nodo
Tessuo da amor, ma che l'onor non sdegna,
Che durarà tra nu costante e sodo
Insin che morte a romperlo no vegna;
Sì, più che t'amo, o Nina, e più m'inodo,
E sempre più d'amor te trovo degna,
Nè xe a maravegiarse; amor t'à fato
Per far, col te cognosse, ognun beato.
24Al mio ritiro società no manca,
Picola in vero, ma genial, ma rara,
Nissun sbadagia mai, nissun se stanca;
Se ragiona, se canta, se prepara
