Ghe fa roche e cesteli; ora ghe brila
Amor nel viso, ora i sospira e i zeme;
Istorie, o fiabe, le più vechie conta,
O dove la Versiera vive sconta.
18Fa sti filò che in mascara se rida
Con Nina mia, con Nina dal cuor belo,
Che ste regazze a cantuzzar la sfida;
Ma la luna che brila in mezzo al cielo,
I nostri passi temerari invida,
A l'aria averta disprezzando el zelo,
E al lume dei so ragi la belezza
Se contempla dei cieli e la grandezza:
19Ah, che stracarse l'ochio mio no possa,
No possa mai de contemplarve, o cieli!
Ghe xe teatri al mondo, ghe xe cossa
Che sia come se' vu maestosi e beli?
Quel'anema brutal, che no vien scossa
A un spetacolo tal, coi pipistreli,
Coi tassi, co le talpe e le marmote,
Viva a palpon ne la più negra note.
20Vogia el destin che st'umile caseta,
Sti campi, e Nina mia mai no me manchi;
Me sarà ogni stagion cara e dileta,
Che nassa i fiori, o che 'l teren se imbianchi,
L'istesso inverno, che spaventa e inquieta
Quei che vive in Cità, co amor ai fianchi
De un nodo autor, che sto mio cuor no acusa,
Saluderà contenta la mia Musa.
