XIX. Fragilità della bellezza
Vedeu sta bruta vechia che xe qua?
A i so' dì la ga molti inamorà,
E adesso che la xe canùa e grima
No la trova nissun che più la stima:
Done bele, tiolè esempio da questa,
E moderè quel fumo che avè in testa:
Va la belezza come che va el lampo,
E, vechie, no ve resta apena el stampo!
XX. Arguta risposta
Un certo paesan gavea un caval
Longo e magro che parea un feral.
Un ghe domanda: A quanto al brazzo
Vendaressi sto vostro cavalazzo?
E lu, alzando la coda con disprezzo:
Entrè in botega che farò bon prezzo.
