Vado a casa, me tiro in t'un canton,
Divoro el scartafazzo come el pan;
Ma sentì che fatal combinazion!
A forza de passar de man in man
Ghe gera andà via i segni del carbon,
E me pareva turco l'italian,
De maniera che apena go podesto
Rilevar quatro otave, e ò perso el resto.
Conte Beneto, no savendo come
Pagar le obligazion che go co vu,
Ve regalo nel dì del vostro nome
L'autografo col poco che gh'è su:
No lo stè a refudar, chè 'l dise tòme...
So ben che meritè molto de più,
Ma za basta el bon cuor. Eco le otave,
Che ò leto per el buso de la chiave.
«Su i cavai de Corinto de la piazza
»Una bela matina s'à trovà,
»No più co l'elmo, ma co la lumazza
»Sior Coleoni e sior Gatamelà:
»Dal sotocoa cascava la boazza,
»E tuti a boca verta stava là
»A goder sto bacan da zioba grasso,
»E sin i muri xe restai de sasso.
