― La me par omo prudente,
E vôi far con ela un sfogo:
No fa minga solamente
I pastizzi, sala, el cogo;
La gran arte soprafina
Del pastizzo ga trovà
Tropo streta la cusina,
E s'à spanto in società.
Oh! la ride? Chi è sinceri
No sa dir una busia;
Semo tuti pastizzeri,
Tuto xe pastizzeria.
Carte in tola: sala quanti
Che ga un credito postizzo
E no i pol tirar avanti,
I se giusta con un pastizzo?
Sala quanti vinze al zogo
Perchè i xe maestri ne l'arte,
E i sa far megio de un cuogo
El pastizzo ne le carte?
El librer a la Sirena
Col qual semo in bona lega,
Me diseva che 'l ga piena
De pastizzi la botega.
