E s'el xe de macaroni
Coi sponzioli, col persuto,
Co le trifole... minchioni!
Da magnar el piato e tuto.
Mi ghe nomino fra tanti
I più semplici pastizzi,
Ma ghe n'è de più picanti,
De più fini e licaizzi.
Basta dirghe che i golosi
Co i pol spender dei luigi
Fa vegnir queli famosi
De Strasburgo e de Parigi.
A le tole dei signori,
Quando capita sto piato,
Se ghe inchina i professori
De la scienza del palato.
A le curte: chi no loda
El pastizzo, no ga sal,
El xe el piato de gran moda,
El xe 'l piato universal.
Mi credeva terminada
La lezion, ma quel galioto
El me tien per la velada,
El me dà staltro rechioto.
