XXXV.
Ah, vissare, che giubilo e che vista
Che mì godesto no go mai l'ugual,
Quando Manin, seguìo dal genaral
Pepe, co' in viso un'aria nè ben trista
Nè ben alegra, el ga passà in rivista
I soldai de la Guardia Nazional,
Peti de bronzo, gareti de azzal
Che andai sarìa del mondo a la conquista!
Sventola le bandiere sui penoni
E se sente 'rivar, de trato in trato,
Da lontan, el rebombo dei canoni.
― Viva San Marco! ― el ziga ― Iddio lo vuole! ―
E un colpo de canon, ma tanto fato,
Ga messo el punto fermo a ste parole.
