Mai più no vogio femene

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.

[p. 408 modifica]

Mai più no vogio femene
     Tratar in avegnir;
     Le ò conossue per pratica,
     E tropo delirante
     5Ò avudo da sofrir
     Straniezze tante.
Vedo in ancuo benissimo
     Come in amor fortuna
     Ghe vol, più assae che meriti;
     10E i poveri poeti
     Mai no ghe n'à nissuna,
     I xe negleti.
Ò fato ogni pussibile
     Per cativarme el cuor
     15De qualche dona amabile,
     Ma sempre fiasco ò fato.
     Ergo per far l'amor
     Mi no son nato.
Per quanto che m'esamina
     20No so d'aver pecai.
     Sempre costante e ingenuo
     Ò conservà el mio afeto,
     Nè in gnente a mancà mai
     El mio rispeto.
25Aver de l'antipatico
     No credo certamente:
     No son un omo vechio,
     E in qualche congiuntura
     Posso discretamente
     30Far figura.
No son tanto melifluo,
     Lo acordo, nel parlar,
     Ma se me vede l'anima,
     Ma se me leze in cuor,
     35Che so anca mi gustar
     Un vero amor.
No son el sior Cristofolo,
     Che manierete afeta,
     Ma so anca mi benissimo,
     40E senza esser secante,
     Dir qualche paroleta
     Insinuante.

[p. 409 modifica]

     Ma gnanca esser un etico
     No bramaria per questo;
     45Go sanità perfeta,
     E vaga el resto.
Teresa mo me tacia
     Che peco in gelosia,
     Ma come xe pussibile
     50Che un omo vogia ben,
     E indiferente 'l sia
     A quel che vien?
El far da secondario,
     El far da stropabuso,
     55Mai no m'à piasso, a dirvela;
     Son facile e indulgente,
     Ma questo lo ricuso;
     O solo, o gnente.
Dise la siora Malgara:
     60No se comanda al cuor,
     Ma xe le sole bestie,
     Che senza riflession
     Seconda, più che amor,
     La so passion.
65La Nina xe insensibile
     Al mio sincero afeto.
     A letere da scatola,
     Perchè no resta iluso,
     La me l'à dito schieto
     70In sul mio muso.
Dirò: che no me merita
     Chi donca no me vol,
     E cercarò passarmela
     Co qualche bon amigo,
     75Ma un pochetin me dol,
     Sincero el digo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Mai_più_no_vogio_femene&oldid=39372"