Luna de zugno
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Vu, che avè el cuor zentil,
Vu, dolci amanti,
Vu, che ve amè costanti
4Sin dal più verde april,
Za che se mostra in ciel
Sora d'ogni altra stela
Piena d'un dolce miel
8Cinzia la bela,
Za che mai più cussì
Seren el viso,
Nè grato xe stà 'l riso
12Come che l'è in sti dì,
Vegnì qua su sto pra
Da sti russei frescheti,
Da sti verdi boscheti
16Intorno circondà;
Vegnila a venerar,
Vegnì a sentir in peto
Quel che la sa ispirar
20Divin afeto!
Vardela su quel col,
L'è arzento puro:
Ga da invidiarla el sol,
24Mi son sicuro.
E vardè là, vardè
Fra quei lauri odorosi,
Fra quei mirti amorosi
28Come a trati la xe!
Come vien a interzar
L'ombra l'arzento,
Come la va a scherzar
32Fra i rami drento.
Oh d'ogni amante cuor
Serenatrice;
Oh ti consolatrice
36D'ogni amoroso ardor!
Risplendi sempre in ciel,
Mai no robarte,
No portarghe sto fiel
40A chi sa amarte.