Letera, che compagna un regalo

by Lodovico Pastò

3 Letera, che compagna un regalo Lodovico Pastò 1822 XIX Poesie

Indice:Poesie edite ed inedite de Lodovico Pastò venezian.djvu

Lodovico Pastò

Letera, che compagna un regalo

1822

Edission original:	Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822
Fonte:	Indice:Poesie edite ed inedite de Lodovico Pastò venezian.djvu

Edission e fonte ▼

LETERA

Che accompagna un Regalo.

Là 'l creda, Sior Domenego,
     Bagnoli ò visto appena,
     Che ò perso l'apetito
     4Tanto a disnar, che a cena:
Ò perso l'alegria,
     Ò perso el bon umor,
     Nè più se conosseva
     8El povero Dotor;
Insoma, senza burle.
     Per mi l'andava mal,
     Se al mondo no ghe gera
     12El sugo del bocal.
Me taco donca a quelo,
     E bevo alegramente;
     Ma bevo un poco tropo,
     16E tropo ingordamente;
E dopo aver dà fondo
     A un mezzo bariloto...
     La varda cher desgrazia!
     20Me trovo tuto coto;
E qual furioso Orlando
     Coro in tel mio ponaro.
     Adio caponi e dindie,
     24Ancuo no ghè riparo;

Chi resta senza colo,
     Chi zoto snombolà...
     Mo quante a quei gramazzi,
     28Mo quante ghe n'ò dà!
Vago po' in colombera
     A terminar la festa,
     Dandoghe a più colombi
     32Un legno su la testa...
La ride, Sior Domenego?
     Pur tropo digo el vero,
     Pur tropo; co son coto
     36Devento un omo fiero.
L'averza pur la cesta,
     Dove la troverà
     Parte dele bestiole,
     40Che mi go trucidà;
Unitamente a un lievro
     Putin, e familiar,
     Che m'è vegnù in ti piè
     44Da vogia de crepar.
Che xe po' frà sta roba
     Anca do bondolete,
     Che no sarà cative,
     48Se no le xe perfete;
E queste ghe le mando,
     Perchè la prega el Cielo,
     Che beva rare volte,
     52O beva più belbelo.