Le Camare de Lavoro
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← La Lege de Don Ciccio | Edission e fonte ▼ | Una decision de Vigo → |
Sì per dia, che l'è un miracolo,
In sto secolo bufon,
Che trovar no gabia ostacolo
Per lavoro chi xe bon.
No se sera più la strada,
No se prega opur scongiura,
Sol se dixe che ognun vada
Che lavoro ghe n'è a usura.
Una Camera xe averta
Per el popolo sovran,
La polenta el trova certa
Per ancùo e per doman.
Per lavoro sì sta camera
La xe averta in ogni ora
Perchè gabia el solo povaro
Andar drento in so bonora.
Più che penso, più che rumino
Sul poter de sta invenzion,
No capisso come i omeni
Tardigà sta istituzion,
I abia proprio fin adesso,
Per ciapar dentro la rede
Senza chiederghe permesso
Tanti merli che ghe crede.
Che trionfo! o che cucagna!
Di chi zelo sto pensier
Che ognun possa dir se magna
Se lavora col mestier?
Se se cava le so brame
Lavorando in questo modo,
No se mor più da la fame
Se ga carne e se ga brodo?
Sì per dia, che l'è un miracolo,
In sto secolo bufon,
Che trovar no gabia ostacolo
Per lavoro chi xe bon.