La moda... bombardiera
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← El teramoto | Edission e fonte ▼ | Cercando i anarchici → |
Xe l'Italia sempre stada
Una fèmena leziera
Cota, morta, inamorada
De la moda forestiera;
Ma la moda ancuo in vigor
Xe la bomba, xe 'l teror!
A la larga, Italia mia,
Da sta usanza maledeta
Che inventà ga l'Anarchia
Per compir la so vendeta
Più nefanda, più brutal,
Più tremenda e più infernal!
Sto bel ordine politico,
Economico-soçial...
De ridurlo paralitico
Xe de çerti l'ideal,
Che i proçessi e la galera
No li fa cambiar de çiera!
No ghe fa gnanca paura
La cravata parigina...
Quela tal... manifatura
De madama Ghigliotina!..
Figurèmose da nu,
Che la forca no gh'è più!
Xe per questo che le bombe
Anca qua se vol usar,
No badando se le tombe
Che se vede spalancar
Le riceve dei nemici
O dei povari infeliçi
Che vivendo de l'onesto
So lavoro, i ga in pensier,
Come omeni de sesto,
I so' fioi, la so' mugier;
Che i ga altro per la mente...
E no i bada a quela zente
Che vorìa sto vecio mondo
Rebaltar col culo in su,
Impiegandoghe un secondo.
De minuto.. o poco più,
Persuasa de far ben...,
De cambiar la pagia in fien!
A la larga, Italia mia,
Da sta zente senza testa,
Che te crede l'Anarchia
Una dona santa e onesta!
A la larga da sta siora!...
Che la vada in so malora!
Ti, ti ga d'aver prudenza
El coragio de sofrir
Senza perder la pazienza
E sperar ne l'avenir.
Xe un secreto, questo qua,
Che sbagliar no podarà!
- Note
- ↑ Questa poesia e le altre due che seguono furono scritte e pubblicate nel Sior Tonin Bonagrazia l'anno 1894 in cui il Governo del Re, con energica severità volle provvedere, e provvide, al mantenimento dell'ordine e della pace interna dello Stato mediante Leggi, cosidette eccezionali, contro i socialisti-anarchici che nella Lunigiana ed in Sicilia avevano già cominciata la loro opera di demolizione, come già nella vicina Francia dove, colle bombe e colla dinamite, distruggevano persone ed averi.