La baba
LA BABA.1
Tuto el giorno la brontola; per ela
No va ben gnente, tuto xe mal fato;
La ghe taroca2 sempre ala putela,
Guai se un momento la carezza el gato.
La serva, disgraziada, no fa tela,3
La devi lavorar proprio a contrato;
Vien zo la casa, vien, orcamastela,4
Se per fatalità se rompi un piato.
Tuto devi esser lustro5 come un specio,
E se me intrigo mi:6 «Zito! la ziga,
Protetor dele serve, bruto vecio!
Pensa ai tui fati, qua son mi parona!»
Ma in segreto bisogna che ve diga
Che la xe in fondo una gran brava dona.
- Note
- ↑ la baba, la donna, ma scherzosamente dicesi in senso di moglie. Qui vale: mia moglie in tono di scherzo quasi affettuoso
- ↑ La ghe taroca, tarocar, brontolare, sgridare
- ↑ no fa tela, non ci riesce, non la azzecca
- ↑ Orcamastela! esclamazione come per bacco! poffarbacco!
- ↑ lustro, lucido
- ↑ se me intrigo mi, se mi immischio io.