La Nina che ride e la Nina che pianse

by Berto Barbarani

3 La Nina che ride e la Nina che pianse I due canzonieri I due canzonieri/Libro V - Le adesine El montanar pacifico La margarita de Trento Berto Barbarani 1911 XX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro V - Le adesine

La Nina che ride e la Nina che pianse

1911

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  El montanar pacifico

Edission e fonte ▼

La margarita de Trento  →

LA NINA CHE RIDE

E

LA NINA CHE PIANSE.

I.

Ridi!... – Ela la ride... E come bate
su i sassi bianchi un salto de fontana,
par che da i denti e da la boca sana,
come polpa de fragole in t'el late;

soto el convulso de le cose mate
che mi ghe conto, un timbro de campana
sia la so vosse, un nio¹ de puti in nana,
o de pàssare svelte a pena fate...²

Ridi!... – Ela la ride, e da le spale,
dal sen, soto le scapole, dai fianchi,
come un mòvar de foie o un bàtar d'ale,

dal bel corpo de dona inamorada,
traverso el filtro de quei denti bianchi
se scrivoltola³ in çiel la so ridada!⁴

II.

La me morosa l'è 'na moretina
piena de grassia e furba de talento,
la g'à i cavei de seda molesina,⁵
tegnudi su da un pètene d'argento...

Neri anca⁶ i oci dove se infrusina⁷
diverse qualità de sentimento,
labri de fogo vivo de cusina,
col nasin che ghe fa da paravento...

La me morosa la g'à nome Nina...
Quando la pianse la trà fora i oci
e se ghe inrabia tuta la facina;

trema i mobili e i seci, i piati i s-cioca,
piove lagrime in perla sui zenoci,
e mi pronto a ciaparle co la boca! –

---

Note

1. nio: nido
2. a pena fate: appena allevate
3. se scrivoltola: si scapriola
4. ridada: risata.
5. molesina: morbida
6. anca: anche
7. se infrusina: si infuliggina.