La Neve
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
Puti cari, odìo, che giubilo!
Xe vegnù la biancolina:
Co l'ò vista sta matina,
4Me son tuto consolà.
Mo no xèlo un bel spetacolo,
Un piaser, un gran contento
A veder in t'un momento
8Tuto el mondo sbianchizzà!
Formaremo ponti, e statue,
Zogaremo a le balote,
E ste care zovenote
12De nualtri riderà.
Se faremo dele trapole
Per chiapar dei oseleti,
Che da fame, povereti,
16In la rede i cascherà.
Varderemo chi è più pratici
De tirar in tel taolazzo,
E i putei, che no ga brazzo
20A mariorba i zogherà.
Che coriere! mo ghe tombole!
Mo che bele scopazzae!
Benedete ste zornae!
24I gran beni le ne dà!
Benedeta pur sta zogia...
Fioca, cara, fioca sì;
Fioca pur sempre cussì,
28No sbalar per carità!
E vualtri vechi miseri;
Che la neve no ve piase,
Andè in leto in santa pase,
32E leveve co xe istà.