La Lontananza (Marco Pescante)
|
Edission original: |
Marco Pescante, Saggio di poesie veneziane, Venezia, dalla tipografia di Luigi Plet, 1835 |
|
Fonte: |
| ← XIX. La Freve | Edission e fonte ▼ | XXI. El Trionfo d'Amore → |
Cicalata a la Bonêr
XX.
A Mantova mi son, Nina a Treviso,
E (a chi no lo savesse) ghe l'aviso
Che son de strada ben novanta miari
Lontan da quel bel viso!...
5Cossa ve par, mii cari?
Un omo inamorà come son mi
Come mai porlo vivare cussì?...
(La xe una gran malora
Dover vivar lontan da chi s'adora!)
10Co son lontan da ti, Nineta cara,
Mi me trovo nel fisico assae mal,
E pezo nel moral;
Sta lontananza me xe tropo amara:
Perchè, riguardo al fisico,
15Me pare d'essar tisico,
E, del moral parlando,
Passo i dì come quei che vive in bando.
Quando te so lontan
Mi vivo come un can;
20Quando no te so a rente
Vivo come un serpente;
De ben no go una fregola,
Vivachio senza regola
Mentre nel mare de sta vita inqueta
25La dolce to presenza, o mia Nineta...
Ah! quel to caro viso, o Nina bela,
Me serve da timon, bussola e stela.
Sì! credilo, mia vita,
Per mi qua in tera la to luse sola
30Xe quela, che me acende, me consola,
Perchè senza de ti
Viver felice mi no posso un dì... —
(Ma no l'è una malora
Dover viver lontan da chi s'adora?)
35Al tempo del Diluvio universal,
Quando xe alfin sbalà
Quel fià de piovesina,
(Til sà, mia cara Nina,)
Dopo la barafusola fatal,
40Giudicando Noè che sia quetà
La burasca, che aveva el Ciel mandà
A punire el pecà,
Cossa galo pensà?
El Corvo l'à molà
45Fora del so portêlo
Ond'esplorar la colera del Cielo:
Ma quel cagadonao birbo d'osêlo
De fora el xe restà
Smagnuzzando qua e là
50Da inesorabile,
Da disperà
Sora i cadaveri,
Che l'à catà.
Noè vedendo, che costù no vien,
55El s'à missià un pocheto de velen...
Ma sortida la cara Colomba
Xe ala fin svolazzando qua e là,
E ala fin messagiera de pace
Dopo poco la xe capità.
60E brilando, e sporzendo per l'aria
Dal so bêco un rameto d'olivo,
Co un sestin tra modesto e lascivo
A Noè la ghe l'à presentà.
Osservandola alora el bon Vechio,
65Pace, pace, el s'à messo a cigar ...
Tuta alora la santa famegia
Pace, pace s'à messo a cantar.
E la còngrega unanime ruzola
Dele Bestie, che gera in Barcon,
70Palesando un'umana legrezza,
S'à mostrà come in gran confusion.
Anche i Orsi, i Lioni, la Tigre,
La Pantèra, anch'el Lupo, anch'el Can
Che i disesse pareva in quel punto,
75Pace, pace, à fenio l'Oragan.
Dunque mi, che son lontan
Dala Puta del mio cuor,
Son come nela barca del dolor
In mezzo a un mare, che me fa teror,
80Aspetando la Colomba
Col'olivo dela pace;
E sta tenera Colomba,
Cara Nina, ti xe ti;
La Colomba predileta,
85La Colomba benedeta,
Quel'amabile Nineta,
Che me fa penar cussì.
Chè se mi no vegno là,
O se ti no ti vien qua...
90Qua per star sempre co mi,
La burasca se fa bruta...
E ala fin, mia cara Puta,
Vado a pico a naufragar.
E perciò a tranquilizzar
95La tempesta del mio mar
Sastu quel che ti à da far?
Eco qua, ti m'à d'amar:
Che in sto caso, se no posso
Nè ti poli per adesso
100Mi vegnir dove ti xe,
Ti vegnir dove son mi,
(Quando so, quando conosso
Che la Nina me vol ben)
Aspetando i cari dì
105De poder viver co ti,
Me consolo e me conforto
E la proa dirigo al porto
De la pace e del'amor
Con coragio, perchè alora
110Senza tema dela bôra
So ch'el vento el go in favor.
(Ah! la xe una gran malora
El vivere lontan da chi s'adora!)
A Mantova mi son, Nina a Treviso!
115De strada son lontan novanta miari
Da quel so caro viso!
Cossa ve par, mii cari?
No l'è una gran malora
Sto vivere lontan da chi s'adora?
120Mi go la testa tanto incocalia,
Che me pare dasseno
Ch'el cervel m'abia fato la scarpìa.
Per gnente m'inveleno...
Per gnente rido e pianzo, e qualche zorno
125No me n'importa un corno
Nè de magnar,
Nè de parlar,
Nè de sonar,
Nè de cantar,
130Nè de star,
Nè de andar,
Né de vivare gnanca, e, per fenire,
(Vel dirò) in qualche dì voria morire.
E sì el morire xe una bruta cossa;
135A tuti per natura
Fa ribrezzo e paura
Quel'andar soteradi in tuna fossa...
E pure mi, vel digo schieto, o cari,
In qualche zorno fazzo dei lunari,
140Che me fa tropo bagolar la testa;
Perchè senza de Nina
Me par d'esser serà in tuna cantina
Tuta zepa da freschin,
Senza bote e senza vin,
145Come un sorze renegà...
Come un piavolo insempià...
Come un can sempre irabià...
Malinconico, isolà,
Insofribile a mi e ala Società.
150Son po in tuna cità — che assae se aprezza,
Ma che in pien xe una bela e gran Fortezza.
Portoni de qua,
Canòni de là,
Bariere de sù,
155Resteli de zò...
Amici!!... qualche volta mi no sò,
Fra tanti bei rumezzi
D'eroici diavolezzi,
In tun logo difeso a sta maniera,
160Se sia tempo de paze, o pur de guera.
E guera ghe n'ò tanta nel mio cuor,
Incandìdo dai fulmini d'amor,
Che vedendo sti aparati
Dela morte e del valor,
165Le mie smanie tute in fragia
Fa in sto pêto una marmagia
De contrasto, de batagia,
Che inasprisce el mio dolor.
Oh! Virgilio!... Oh! famoso Poeta,
170Che in sti loghi ti à avudo la cuna,
Senti un poco, che a una per una
Le mie pene te vogio contar.
Ti che sin dai mii zorni inocenti
Ti xe stà el mio Maestro sublime,
175Dele insipide e basse mie rime
No te ofenda el concento volgar.
Xe trent'ani, che son sula tera
Vivachiando fra noje e sospiri,
Ma d'amore i soavi deliri
180Sin adesso no m'à stuzzegà.
Ma in adesso... ah! Virgilio... Virgilio!
Ne la rede d'amor so imbrogià
Per 'na Puta, che odiarme no pole,
(Credarìa) ma lontana de qua.
185Da sta Nina (che Nina l'à nome)
Vinti lune ò da viver lontan
Fatalmente... ma vivare come?
Come un schiavo fra i barbari... un can!
Questo xe el lagrimevole sunto
190Dei mii afani, o imortale Maron:
Sofri un fià de ascoltarme dal'Èrebo,
Sofri un fià, te domando perdon.
Oh ilustre!.. oh celebre
Ombra dileta
195Del somo Genio,
Del gran Poeta!
Ah! ti al'amabile
Dolce Nineta
Fa ch'el mio Cantico
200Ghe ariva al cuor,
Manifestandoghe
Tuto el brusor
Che in mi fa nàssare
Sto ardente amor,
205O incomparabile,
Divin Cantor!
Perchè in sta lontananza — in sta distanza
Me par, se no m'ilude el mio dolor,
D'aver quasi imparà come se mor —
210Restando intanto armà dela Speranza,
E aspetando el caro dì,
Nina, de cominciare a star co ti,
Me consolo e me conforto,
E la proa dirigo al porto
215De la Pace e del'Amor
Con coragio, perchè spero
D'otener dal to bel cuor
Sto fedel sincero amor — e dunque alora,
Senza tema de la bôra,
220Tuto el vento el go in favor. —
(Ah! la xe una gran malora
Sto vivere lontan da chi se adora! — )