La Comission per la nova lege su la laguna
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Per nozze Ernesto Chiarion-Casoni e co. Emma Baglioni | Edission e fonte ▼ | El Stropolo → |
Da bravi, o sapientissimi,
Che unidi in Comission
De sta laguna arbitri
De legi in formazion,
Studiè la topografica
De sta laguna forma,
De l'aqua i movimenti
Come che i se trasforma;
De sto bacin vastissimo
La storia investighė,
E po' vegnì franchissimi
Ai tempi che se xe.
Per carità lustrissimi,
No steve a spaventar
Se vedarè fra i celebri
Qualcun che avùo a falar.
Co calcoli ipotetici
D'idraulica a so' modo
I ga savùo benissimo
Piantar un falso ciodo,
I à dito exempli gratia
Che la laguna viva
Co' sacche inumerevoli
D'aqua no sarà priva,
Per mantegnir ut mores
De la laguna morta
Le valli che ve esiste
Co l'aqua che le porta,
I à dito stupidissime
Cose che a dirle nù
De bestie proprio el titolo
Se toleria po' su.
I à fato provisorie
Lege, regolamento,
Che a lezer quei articoli
Ghe da ciapar spavento;
Dove se vede proprio
La scienza in decadenza,
Dove no ghe d'idraulica
Nemanco la semenza.
Scordada xe la pratica
S'à messo servitù
Che conterà per secoli
Quanto à contà un cucù.
Da bravi, co' sto esempio
Podè far ben assae,
Fe' entrar de le bonifiche
L'aque tute slavae,
Drento de sta sanissima
Laguna de Venezia
E sentirè da tuti
Dirve che l'è un inezia.
Metè più severissime
De pesca proibizion,
Che sia pescar delito
In tute le stagion,
Metè, che za credemelo,
Ancuo za tuto passa,
Per chi che vol pescar
Una gravosa tassa,
Metè; ma questa subito,
Tassa per chi imbonisse;
Ma vualtri fe' l'istesso
Che za no i ve capisse.
Continuè sto metodo,
E vedarè per certo
Che de ste legi l'esito
No 'l sarà mai incerto.
Vardè, no fe' spropositi,
Savè ghe un memorial
Scrito da celebrissimi
Inzegni da canal,
De porti studiosissimi
De ghebi e anca de ri,
Che à scrito cose splendide
Da far de note dì.
Mi gavaria tantissime
Cose da dirve ancora;
Ma de finir credemelo
Proprio no vedo l'ora.