La Coda recisa
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
Un Zovene una volta se trovava
In palazzo a san Marco, dove i fava
El placito d'un tal che avea scanada
Un'infelice Dona sfortunada;
5E come ne la calca de la zente
Se trova anca dei ladri, da prudente
L'à assicurà i relogi, avendo messe
Le do' caene drento in le braghesse;
E stando co le man ne le scarsele
10De la velada, custodiva in quele
Do' fazzoli, un bianco, un de color,
E ascoltava tranquilo l'Orator.
Un Putazzo, che a lu gera vicin,
À dito verso un altro: Saveu quanti
15In sta sala birbanti
Vien per robar i fazzoleti, e fin
Anca i relogi? Stassela pur là,
L'altro risposto ga:
Ma tanti anca ghe xe che vien a far
20Baronae d'altro andar:
A un Signor, giusto geri,
No so se vu ghe geri;
I gh'à tagià la coa
Longa sie bone quarte, e tuta soa;
25Che no ve digo gnente
Quanto l'era furente!
El Zovene, sentìo sto tal raconto,
Che anch'elo avea una coa de qualche conto,
Per poderse salvar anca da questo,
30Da la scarsela à tirà fora presto
Una man, e s'à messo
La coa davanti, e nel momento istesso
L'è tornà co la man ne la scarsela.
No l'à trovà più in quela
35El fazzoleto che ghe gera avanti,
Che robà ghe l'avea quei do' birbanti.
Sorpreso l'è restà, ma l'à ridesto,
Perchè infati da rider caso è questo.
Gh'è certe baronae
40Che anderìa, son per dir, squasi premiae.