Lètara al Signor

by Berto Barbarani

3 Lètara al Signor I due canzonieri I due canzonieri/Libro I - El rosario del cor Vuto no? Vuto sì? Ruda, Ruda Berto Barbarani 1895 XIX Poesie veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro I - El rosario del cor

Lètara al Signor

1895

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  Vuto no? Vuto sì?

Edission e fonte ▼

Ruda, Ruda  →

LÈTARA AL SIGNOR.

     Me sio^[1] m'à dito: no te dao più un scheo,^[2]
la me morosa: no te guardo più!
Signor, slonghème un deo,^[3]
che me ghe taca e pò tirèlo su.

     L'è du giorni, dal bon, che fago passi,
in çerca de lavoro e son digiuno!
Gh'è tanti preti grassi,
che mi finisso col magnarde uno...!

     La providensa, i dise, no la fa
mancar gnente a i osei su i albareti;
par sta fame che quà,
ghe ne voria par mi de i oseleti!

     E i conta, che g'аvì fra tante cose,
de i vestiti (no' stè scurlar^[4] le recie)
tuti perle pressiose...
Butème zo le vostre braghe vecie!

---

Note

1. sio: zio
2. scheo: centesimo
3. deo: dito
4. scurlar: scuotere.