L'omo superbo
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← A una Letterata | Edission e fonte ▼ | El pensier → |
L'omo superbo
Quando che sento un omo decantar
el so bon cuor, l'inzegno, e dapartuto
paonegiarse e farse risaltar,
par mi quel omo ga un difeto bruto.
Galo bon cuor? — Patron, che 'l lassa star,
che 'l fassa finta d'essar sordo e muto,
e no ghe mancarà chi sapia far
da vecio trasformarmelo in bel puto.
Galo capacità? ― Cussì se dise.
Se vero xe, 'l bruschin capitarà
a farlo lustro come la vernise.
Ma lu, par carità, co la so lima
che nol se frega mai, parchè se sa
che l'omo tanto val quanto el se stima.