L'ipocondriaco
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← L'omo de mistier | Edission e fonte ▼ | El bontempon → |
L'IPOCONDRIACO
Co me sento in desordene el figà,
E ne la gnuca i sintomi del splin,
Me devo calumar soto 'l piumin,
E fin che la me passa resto là;
Se no, tuto va in oca el mio morbin,
Perdo le gambe, la parola e 'l fià;
Pien de soldi, me credo un desperà;
Nobile, me retegno un zavatin.
Da sti amici tacai co la spuazza
Scampo, e di e note studio la maniera
De far un salto zo dal campanil.
Se per disperazion vado a la cazza,
Speto 'l tordo e 'l fasan co l’ocio in tera;
Davanti al lievro meto zo el fusil.