L'Uomo grande ed il piccolo
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
Gh'era un paese al mondo
(Che 'l nome no lo so
Perchè no mel recordo
Ma se mai ve premesse el saverò)
5Del qual i abitanti
No solo gera manco de ziganti,
Ma de una tal statura,
Che per esempio a un ussaro
No i ghe arivava gnanca a la centura.
10Col trapassar dei ani
Xe nato, che qualcun de sti paesani
Metendose a viazar
In sti nostri paesi à bu a arivar,
Ma co i s'à visto in linea de statura
15Far una miserissima figura,
I à pensà de slongarla
Per quanto ch'i à possù:
La testa i à drezzà su,
I à trato el peto in fora,
20I à retirà el martin,
Marchiando sempre in ponta de scapin;
E con sto studio, dopo aver strussià
Tre quatr'once i s'à alzà;
Senza però schivar
25El rider de la zente
E 'l rischio de cascar.
Co a casa i xe tornai,
Fra i costumi portai,
I à messo in moda questo,
30Che in verità à piasesto,
Perchè co sto slongarse de statura
Ghe pareva de far megio figura.
Ognun sta nova moda à volsù tor,
E l'à fato furor.
35Intanto un viagiator
De sti nostri paesi xe arivà
Anca in quel logo là;
Che quantunque nol fusse
D'una statura stramba e zigantesca,
40El podeva a quei stropoli
Magnarghe i macaroni su la testa.
Al so primo arivar
Tuti l'à buo a stimar;
Ma quando ch'i l'à visto a caminar
45Senza studio, a la bona,
Co tuto el piè puzà,
E senza donar gnente a la persona,
I à dito: Che pecà,
Che un ometo che xe piutosto grando
50Vada co sto mal sesto caminando!
E uno fra quei tanti
Se gh'à fato davanti,
E à bu el coragio de parlar cussì:
Perchè no camineu, sior, come mì?
55Per cossa no ve alzeo? —
— Infelice Pigmeo,
Gh'à risposto ridando el forestier,
Chi è grando no à bisogno de parer.