L'Ava e 'l Pavegio
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Za l'Aurora per i campi
Dà la cazza al lusariol;
Za da l'onde tra i so lampi,
4Scampa e ride el novo Sol.
Dise a l'Ave la regina:
Pute care, adio, bon prò!
Che fragranza a la colina!
8A revederse a filò.
Va la fola industriosa
Sora i gigli; su i gimè,
E chi al timo e chi a la rosa;
12Come andemo nu al Cafè:
Ma nu spesso, povereti,
Rei veleni a sorsegiar;
Senza spesa nè sospeti,
16Ele 'l netare a chiuchiar.
Stava giusto un'Ava un zorno
Sù 'n garofolo in zardin;
Zupegandoghe d'intorno
20A sorseti 'l coresin;
Su quatr'ale tricolori
Un pavegio bel esprì
Passa in quel che a mile fiori
24Dà del naso tuto 'l dì.
El la vede far biancheto
Sul garofolo co 'l va;
E co 'l torna dal boscheto
28El la trova ancora là.
Ma bisogna (el dise), cara,
Che siè propio de bon cuor...
Che costanza! l'è ben rara!
32Chiuchiar sempre, sempre un fior!
Parè un'ostrega incrostada
Su la croda in mezo al mar,
Che no sa trovar la strada
36De poderse destacar.
— Bel emblema dei galanti
(La responde) avè rason;
L'Ava e l'Ostrega costanti
40Xe un perfeto paragon;
Questa e quela serve atente
Al so nobile destin,
E chi è nato a no far gnente
44Nasa fiori per morbin!
Ste delizie podè averle
Vu che ozioso ve fa 'l Ciel,
Ma da l'ostrega el vol perle;
48Da la cera el vol el miel.