Kakalor e Kinkà
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
1El Prencipe Kinkà, l'ereditario,
No so se del Giapon o de la China,
Spassizava in un parco solitario
Col so Mentore al fianco in bagolina,
E la noja, che ai Grandi el tafanario
Xe solita incandir a la perlina,
Secava, come la farìa coi picoli,
A so altezza imperial ambo i testicoli.
2Ministro in parte de ste operazion
Gera el Mentore stesso Kakalor,
El qual con serie indefesse lezion
Ghe insegnava el mestier de Imperador,
Che, com'è noto, à da esser giusto e bon
E magnanimo e intrepido se ocor;
Che co i monarchi à tute ste virtù
No serve un bezzo che le abiemo nu.
3Mentre Kinkà con aulica decenza
Va sbadagiando, un rossignol a volo
Se fica là tra i carpani, e scomenza
A gorghegiarse un delizioso a solo.
In estasi... ma, avezzo a la violenza,
Kinkà ciga: chiapèlo. El rossignolo
A la minacia de la prigionia
Salta a caval d'un zefireto, e via.
4In colera so Altezza. A ti, vien qua,
(El dise a Kakalor) via, sior maestro,
Spiegame mo sta singolarità!
L'oseleto el più amabile, el più destro,
Compositor de sol-do-re-mi-fa,
Scampa, se sconde in bosco: elo un bel estro?
E po vien mile colegati a gropi
Fin su la regia a rovinarme i copi?
5— Signor, risponde a l'imperial Infante,
Severo Kakalor, dovè imparar,
Che mentre se va el scioco e l'ignorante
Al so simile franchi a presentar,
L'omo grando se sconde; ma el regnante
Che felici i so' popoli vol far,
Nol minacia, lo cerca, lo carezza...
Se torna el rossignol, creanza, Altezza.