In lode di Madonna Santina
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
O vu, che stè là suso
In cima del Parnaso,
Conzème un poco el muso
Dè de l'aqua al mio vaso,
Dème dei versi,
Fème tanto favor
Che possa del mio amor
Cantar le parti bele
Sì che ghe n'abia invidia anca le Stele.
Vu fè le scorozzose,
E sì no respondè,
Perchè no se' vezzose
E bele, come xe
Questa Santina.
La è tuta fiama e fogo,
La brusa in ogni logo,
Ogni aspro cuor la impiaga
E de la morte mia l'è sempre vaga.
Ma per farve despeto
La scomenzo a lodar;
Forsi che dal sugeto
Me sarà dà el cantar,
E farò veder
Con vostro dano e scorno
Che 'l Sol a mezo zorno
No luse e scalda tanto
Come custìa che me resolve in pianto.
Custìa porta i caveli
Che i fa vergogna a l'oro,
Cussì aneladi e beli
Ch'i par un bel lavoro
De qualche Orese
Ch'abia la so' botega,
Co la fazzada intrega
E le colone piene
De aneli, de manini e de caene.
La ga la bela fronte
Tuta bianca e lusente,
L'è d'alabastro un ponte
Dove monta la zente.
E 'l Riso e 'l Ziogo,
Le Grazie e i Amoreti
Con ben mile straleti
I fa guera de legni
Che rapisse a mirarla i cuor più degni.
I ochi no xe fogo,
Ma xe chiari splendori
Che ilumina ogni liogo
Che aviva tuti i cuori,
Perchè la xe luse
De l'anema che informa
Quela legiadra forma
Donada a nu dal Cielo
Per ralegrar ognun col so modelo.
Le galie1 po xe riose
Cussì odorose e bde
Che le altre resta ascose
A paragon de quele;
E se talvolta
Le xe un poco più rosse,
Amor co le percosse
Da burla sì le à toche
Per invidiarne i basi a mile boche.
Quela boca amorosa,
Dove ch'Amor gh'à messo
Quanta dolcezza ascosa
À Elicona e Permesso,
Ela xe fata
De perle e de rubini,
E ga certi acentini
In tel so rasonar
Che liga i cuori che no i pol scampar,
Oh boca benedeta
Refugio dei mii mali,
El mio cuor a stafeta
Core tra i to' corali,
E là felice
El vive alegramente
Seguro de la zente,
Lassando el corpo esangue
Che per colpa d'Amor xe tuto sangue.
Soto la boca pende,
Quas'in mezo a un bel monte,
Fosseta che se rende
In meso a quel un fonte,
O veramente
Una grota che ascoso
Tien Amor scorozzoso,
O cassa, ove liogai
Stà i cari sguardi che ghe vien donai;
Ma no vogio più dir
Pe sta bela Santina,
Che no se pol finir
Da sera a la matina;
E mi son fato
De cigno una vil oca,
Nè pol questa mia boca
Zamai tanto lodarla
Che no regna po' dopo a defraudarla.
E Vu, mio Sol, che in tera
Per sempre me fè luse,
No me fè tanta guera,
Acetè le mie scuse,
E credè certo
Che fazzo più che posso,
Daspò che ve cognosso,
Per poderve lodar
E sora tute l'altre celebrar.
No ghe n'è de sì bele
Che no le para ancroie,
Vu se' un Sol fra le Stele,
Ungento a le mie dogie,
Per vu son fato
El più felice amante
Che sia da qua in Levante,
E ch'abia da esser mai,
Credendo esserve in grazia pur assai,
Orsù, cuor mio, ve lasso
E torno a le mie pene,
Perchè son Tizio al sasso
Revolto in le caene.
Co no ve vedo,
E no posso vegnir
Da vu a farme sentir,
Certo no ghe xe al mondo
Dolor del mio più grando e più profondo.
Canzon, va dal mio ben
E dì che 'l vegna presto
Se no el fogo ch'ò in sen
In mi farà del resto;
Perchè mi stimo
Sto mondo bagatele
Senza de le so' Stele,
Che per ele son vivo
E senza d'ele son d'anema privo.
- Note
- ↑ Galie. Guancie, voce fuori d'uso.