In çerca de casa

by Attilio Turco

3 In çerca de casa Sonetti Veronesi Sonetti Veronesi/Parte III - Verona La spesa La luna Attilio Turco 1924 XX Soneti veronese

Indice:Attilio Turco - Sonetti Veronesi.djvu

Attilio Turco ―  Sonetti Veronesi  ― Parte III - Verona

In çerca de casa

1924

Edission original:	Attilio Turco, Sonetti Veronesi, Verona, Tipografia Operaia, 1924
Fonte:	Indice:Attilio Turco - Sonetti Veronesi.djvu

←  La spesa

Edission e fonte ▼

La luna  →

IN ÇERCA DE CASA

— El senta, sior paron, m'è stado dito,
     Che qua gh'è da 'fitar ’n apartamento...
     Se pol darghe n’ociada?¹ E’-lo contento?
     Ci sa che no’ podemo far pulito.

— Si ’l se comoda pura, in sto momento
     Gh'è su 'l pitor che ’l termina un sofito...
     — E quanti loghi?, e quanto è-lo l’afito?...
     — J-è quatro loghi e al mese j’è... tresento!

— Tresento franchi sior? ultimo buso?²
     — Par lu ghe ’l ridurò a dosentotanta!...
     — A no, par carità... Madona santa!...

A far brute figure no son uso!
     No’ l’è n’apartamento par la quale...
     Fasso de manco, sior, de far le scale! —

---

Note

1. ociada ― occhiata;
2. ultimo buso ― prezzo ristretto.