Il Vangelo di S. Matteo volgarizzato in dialetto veneziano/Capo XXVIII
|
Edission original: | |
|
Fonte: |
| ← Capo XXVII | Edission e fonte ▼ |
SABO po de note, che ne portava el primo zorno de la setimana, Maria Madalena, e st'altra Maria le xe andae a far visita al sepolcro.
2 E eco che se fa sentir un gran teremoto. Perchè un anzolo del Signor s'ha calà dal cielo: e fandose arente el ga rebaltà la piera, e el se gà sentà de sora:
3 El so viso gera come el fogo de una saeta, e el so abito del color de la neve.
4 Le guardie per la paura le s ' ha scaturio, e le pareva come morte.
5 L'anzolo po rispondendo a le done el ga dito: No stè a aver paura: perchè mi so, che quel Gesù, che xe sta messo in crose, e che vu altre cerchè
6 Nol xe più qua; el xe ressussità, come xe sta dito. Vegnì pur, e dè un'ochiada al logo, dove gera sta messo el Signor.
7 E in bota andè via, e diseghe ai so Apostoli, che el xe ressussità: e eco che el va avanti de vualtri in Galilea: là lo vedarè. Eco che mi ve go avisà.
8 E le xe andae via subito dal logo del sepolcro piene de paura, e de alegria granda, e le xe corse a portarghe la nova ai Apostoli.
9 E intanto, eco che le se incontra per strada co Gesù, che ghe dise: Dio ve salva. E elle se ga vicinà, le ga streto i so pii, e le lo ga adorà.
10 Alora Gesù ga dito: No stè a aver paura. Andè là, e feghe saver a mi fradei, che i vada in Galilea, e che la i me vedarà.
11 Co le xe voltae via, eco che un poche de le guardie le xe andae in cità, e le ga contà ai capi dei sacerdoti tuto quelo, che gera nato.
12 E lori i s'ha fato de lega coi vechi, i ga tegnuo consegio, e i ga dà un bon grumo de monee ai soldai,
13 Parlandoghe cussì: Ghe dirè: I so Apostoli xe vegnui de note, e co nualtri dormivimo, i ga robà el corpo.
14 E se mai sta cossa vegnisse a rechie del presidente, nu lo quieteremo, e ve meteremo sempre in salvo, che no ve nassa gnente de mal.
15 E colori, messi i bezzi in scarsela, i ga fato come che ghe xe sta insegnà. E sta chiacola la xe andada fora tra i Ebrei, e la dura fin al zorno de ancuo.
16 I undese Apostoli i xe po andai in Galilea in tel monte, che Gesù gaveva per lori stabilio.
17 E co i lo ga visto, i lo ga adorà: ma ghe xe sta qualchedun, che gera in forsi.
18 E Gesù fasendose rente de lori, el ga dito: Me xe stada dada tuta la podestà in cielo e in tera.
19 Su dunque andè, insegneghe a tuti i popoli: batizandoli in nome del Pare, del Fio, e del Spirito santo:
20 Insegneghe de far tuto quelo, che ve go comandà: e eco che mi so co vualtri tuti i zorni, sin al fin dei secoli.