65 Pilato ga risposto: Vu se paroni de le guardie, andè, e vardelo ben, come che ve par e piase.
66 Lori po xe andai via, e i ga messo le guardie atorno a la sepoltura per assicurarla, e sora dela piera i ga puzà tanto de sigilo.
SABO po de note, che ne portava el primo zorno de la setimana, Maria Madalena, e st'altra Maria le xe andae a far visita al sepolcro.
2 E eco che se fa sentir un gran teremoto. Perchè un anzolo del Signor s'ha calà dal cielo: e fandose arente el ga rebaltà la piera, e el se gà sentà de sora:
3 El so viso gera come el fogo de una saeta, e el so abito del color de la neve.
4 Le guardie per la paura le s ' ha scaturio, e le pareva come morte.
5 L'anzolo po rispondendo a le done el ga dito: No stè a aver paura: perchè mi so, che quel Gesù, che xe sta messo in crose, e che vu altre cerchè
6 Nol xe più qua; el xe ressussità, come xe sta dito. Vegnì pur, e dè un'ochiada al logo, dove gera sta messo el Signor.
