Il Vangelo di S. Matteo volgarizzato in dialetto veneziano/Capo XX
|
Edission original: | |
|
Fonte: |
| ← Capo XIX | Edission e fonte ▼ | Capo XXI → |
EL regno del cielo ghe somegia a un omo capo de casa, che de prima matina xe vegnuo fora a menar i laoranti in tela so vigna.
2 E d'acordo coi laoranti de darghe un tanto al zorno, el li ga mandai in tela so vigna.
3 E vegnuo fora de casa circumcirca co sonava terza, el ga visto st'altri, che stava là in piazza senza far gnente,
4 E el ga dito: Andè anca vualtri in tela mia vigna, e ve darò quelo, che sarà giusto.
5 E lori xe andai. Un'altra volta po el xe andà fora de casa sul far de l'ora sesta, e nona, e el ga fato l'istesso.
6 L'è andà anca co sonava undese ore, e el ga catà dei altri là impiantai, che vardava, el el ga dito: Cossa feu qua duri in ozio tuto el zorno?
7 Lori ga dito: Perchè nessun no ne ga tolti a zornada. Lu ga risposto: Andè anca vualtri in tela mia vigna.
8 Co ga po comincià a far scuro, el paron de la vigna ga dito al so fator: Chiama i laoranti, e contighe la paga, scomenzando dai ultimi, e terminando coi primi.
9 Co xe vegnui donca quei, che gera andai circumcirca a undese ore, i ga abuo una monea peromo.
10 Vegnui po i primi, i pretendeva de ricever de più: ma invece i ga abuo anca lori una monea peromo.
11 E tolendola, i s'ha messo a ruzar contro el pare de famegia,
12 Disendo: Quei, che xe vegnui ultimi de tuti i ga lorà per un'ora, e ti l'a fati compagni de quei, che ga portà el peso de tuto el zorno, e del caldo.
13 E lu, a uno de lori rispondendo, el ga dito: Amigo, no intendo de farte ingiustizie: no ti xe sta contento de lorar da mi per quela monea?
14 Chiapa quel, che te vien, e va per i fati toi: mi so paron de darghe quelo, che t'ho dà a ti, nè più, nè manco, anca a chi xe vegnuo ultimo.
15 Star a veder, che no me sarà permesso de far quel, che vogio? o xe cativo el to ochio, perchè mi so bon?
16 In sta maniera sarà ultimi i primi, e primi i ultimi. Perchè tanti xe quei, che xe chiamai, ma pocheti quei, che xe sielti.
17 E movendose Gesù per andar a Gerusaleme, el s'ha tolto co lu i dodese Apostoli in scondon, e el ga dito:
18 Eco che andemo in Gerusaleme, e che el Fio de l'omo sarà tradio dai capi dei preti, e dai Scribi, e i lo condanarà a morte.
19 E i lo consegnerà al popolo per minchionarlo, bastonarlo, meterlo in crose, e tre di dopo el ressussiterà.
20 Alora ghe xe vegnua arente la mare dei fioi de Zebedeo coi fioi d'ela, adorandolo e dimandandoghe, ch'el ghe daga qualcossa.
21 Lu ga dito: Cossa vustu? Ela ga risposto: Ordena, che sti do mi fioi se vegna a sentar uno a man dreta, e st'altro a man zanca in tel to regno.
22 Gesù rispondendoghe, ga dito: No savè quelo, che dimandè. Podaressi vualtri tor su el calice, che mi stago per bever? Lori ga dito: Podemo.
23 Ma lu ga replicà: Si, che beverè el mio calice: ma no toca a mi el far, che ve sentè a man dreta o a man zanca; questa xe una cossa, che xe parechiada a quei, che vorà darghela mio Pare.
24 Co i ga sentio sta strazza de riposta i diese Apostoli, i s'ha invelenà contro quei do fradei.
25 Gesù alora li ga chiamai arente de lu, e el ga dito: Vualtri za savè, che i capurioni dei popoli la fa da paroni co lori: e che quei, che xe più grandi, i ghe fa el de sora, e i li tien in sugizion.
26 Cussì no la sarà intra vualtri: ma chi volesse farse più grando che el vostro paron,
27 E chi volesse tra vualtri esser el primo, el sarà vostro servo.
28 Per l'istessa rason el Fio de l'omo no xe vegnuo per esser servio, ma per servir, e a dar la so vita, per salvarghene tanti.
29 E andando fora tuti de Gerico, ghe xe andà drio una gran caterva de zente:
30 E eco do orbi sentai longo la strada, i ga sentio, che Gesù saria passà: e i s'ha messo a cigar: Signor, pietà de nualtri, fio de Davide.
31 El popolo ghe dava su la ose, perchè i tasesse. Ma lori cigava più a forte, disendo: Signor, pietà de nualtri, fio de Davide.
32 E Gesù s'ha fermà, el li ga chiamai, e el ga dito: Cossa voleu, che ve fazza?
33 Lori ga dito: Signor, fè, che se averza i nostri ochi.
34 A Gesù i ga fato pecà; el ga tocà i so ochi. E in tun supio i ga visto, e i ghe xe andai drio.