Il Mortaio e la Mazza
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
De le volte spassizando,
E baucando
La gnagnera che go vado passando;
E l'altro zorno aponto,
5Che la gaveva proprio maledeta,
Me so trovà in Piazzeta,
E osservando per spasso
Una botega là sto la Zeca,
Dove va, per esempio, la Baleca,1
10Momolo dai zaleti,
Quel che vende oseleti,
E in fin la peverada2
A bever la semada,
M'ò fermà s'un morter
15Che tegniva davanti el cafetier,
Tuto sfeso e sbecà,
Deslavrà, magagnà,
E che pareva za un'antichità,
Co drento una gran mazza
20Che gera tuta strazza,
Macada, desfilada,
E che fra poco tempo
No i l'averave za più doperada;
E go dito al fachin
25Che gera là vicin:
L'è in cao sto to morter. —
— La se ingana, el risponde,
El fa ancora dies'ani el so mestier.
Sala che cussì sfeso e magagnà
30L'à fruà trenta mazze
De quele che xe là: —
— Minchioni, ò replicà,
Ghe cavaremo la moralità.
E go dito cussì,
35Parlando in fra de mi:
Omeni, recordève
Più d'una volta al dì,
Che un morter desbecà,
Deslavrà, magagnà,
40E che deboto xe un'antichità,
El resta ancora là,
E ch'el vien doperà;
Quando che trenta mazze,
Benchè nove de trinca,
45Xe stae ridote in strazze.
- Note