Idolo del mio cuor
|
Edission original: |
Antologia della lirica veneziana, dal 500 ai giorni nostri, a cura de Antonio Pilot, Venezia, Giusto Fuga, 1913 |
|
Fonte: |
Indice:Pilot - Antologia della lirica veneziana, Venezia, Fuga, 1913.djvu |
| Edission e fonte ▼ |
Idolo del mio cuor
ardo per vu d’amor,
e sempre, o mia speranza,
s’avanza el mio penar,
Voria spiegar, o cara,
la mia passion amara,
ma un certo no so che...
no so se m’intendè,
fa che no so parlar.
Quando lontana sè,
quando no me vedè,
voria senza parlarve
spiegarve el mio dolor;
ma co ve son arente
non son più bon da gnente,
un çerto no so che...
no so se m’intendè,
me fa serar el cuor.
Se in viso me vardè
fursi cognossarè
quel barbaro tormento
che sento nel mio sen.
Dissimular voria
la cruda pena mia,
ma un çerto no so che...
no so se m’intendè,
me dixe: el te vol ben.
Mio primo amor vu sè
e l’ultimo sarè
e se ho da maridarrae
sposarme vòi con vu;
ma, cara, temo presto,,,
vorave dirve el resto,
ma un certo no so che...
no so se m’intendè,
no vol che diga più.
Peno la note e ’l dì
per vu sempre cussì;
sta pena, se ò da dirla,
sofrirla più no so;
donca per remediarla,
cara, convien che parla,
ma un çerto no so che...
no so se m’intendè,
fa che parlar no so.
Sento che dixe amor:
lassa sto to rossor
e spiega quel tormento
che drento in cuor ti ga;
ma se a parlar me provo
parole più no trovo,
e un çerto no so che...
no so se m’intendè,
pur tropo m’à incantà.
- Note
- ↑ Da «Il Bugiardo».