I Casteli in Aria
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Tuti sa che là in campagna
Verso l'alba, senza falo
Canta el galo: cucuru.
Dona Cate da la late
5Giusto alora leva su.
Con un passo la xe in stala,
Là la monze la Lucieta
La vacheta che savè;
La prepara po la zara
10Col so late come el xe.
L'altro zorno, andando a ponto
Co la zara su la testa
Scalza e lesta a la cità;
A bel belo un bel castelo
15La s'à in aria fabricà.
Oh! tre lire (la diseva)
De sto late ti ti trovi!
Tanti vovi ti à da tor;
Ti à da darli per coarli
20A la chioca del fator.
Mo no passa minga un mese
Che te becola el formento
Più de cento bei pipì,
Che galine grasse fine
25Te deventa in quatro dì.
Che? la volpe? sì, marmèo!
A vardarle no ti spendi,
Ti le vendi, ma co ben!
Tiò un porcheto; povereto!
30Ve' co belo ch'el te vien!
L'è st'altr'ano da casoto;
Oh, che lardo! el fa la goba,
I tel roba da le man;
Vòi cinquanta, vòi setanta,
35L'è 'l so prezzo come un pan.
Ti pol torte co sti bezzi
Una vaca... ih, che panza!
Oe... t'avanza un vedelon;
Varda, el salta, el se rebalta
40Tra le piegore e 'l molton.
A sto passo d'alegrezza
La fa un salto su la giara,
E la zara, tunfe... zo;
E schiao late, bondì Cate,
45Vovi, porco, vaca e bò.
Done care, tegnì streto,
Cari amici, tegnì duro
Quel sicuro che gavè.
Mo i xe beli!... ma casteli
50Tuti in aria: lo vedè.