Far el medico volè

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
Far el medico volè
1822
Edission e fonte ▼

[p. 116 modifica]

RISPOSTA DEL'AUTOR A UN SO AMIGO CHE LO AVISA D'AVER PENSA' DE FAR EL MEDICO,


CANZON.


Far el miedico volè?
     Felo pur, vu sè el paron,
     Basta solo che sapiè,

[p. 117 modifica]

     4Che fè un gran spropositon.
Me dirè: lo fè anca vu:
     Sì, lo fazzo, povereto!
     Ma son stufo che mai più,
     8E lo fazzo per despeto.
Se saveva da regazzo
     Che mistier xe questo quà,
     No sarave in sto imbarazzo;
     12Saria tropo fortunà,
No se dà per mi mai festa,
     Un respiro no go mai;
     Piova, nevega, tempesta
     16S'à da andar dai amalai.
Ma pazienza el sfadigar,
     E no aver un fià de ben;
     Quel dover anca studiar
     20Quelo xe el mio gran velen!
Perchè mo? perchè, credèlo,
     Più che studio manco imparo,
     Perchè resto sempre quelo,
     24Vogio dir un bel somaro...
Ma mi vedo che stupì;
     Ma mi sento che disè;
     Perchè mai parleu cussì?
     28Steme atento, e 'l saverè.
Me vien proprio i mi dolori
     Nè xa credo d'esser solo,
     Perchè vol i nostri autori
     32Chi la lipa, e chi el pandolo.

[p. 118 modifica]

Chi vol sangue, e chi nol vol,
     Chi no vol che stimolanti,
     Chi sofrirli no li pol;
     36E ognun ga i so partidanti.
Quelo dise: el guarirà,
     Questo: el mor sicuramente...
     Un dei do ghe intoperà,
     40No ghè dubio certamente.
Ma per caso, per fortuna,
     Nò per lege, o per dotrina...
     E no go d'aver la luna
     44Cola Siora Medicina?
In ogn'altra profession
     Se pol dir la xe cussì,
     Se pol render le rason
     48Bele, e chiare quanto el dì.
Sula mera congetura
     Nualtri grami se fondemo,
     E laoremo con paura,
     52Perchè incerti sempre semo
Tale qual la xe, fradelo;
     Gnanca i primi professori
     No ga gnente de più helo
     56E vel digo mi per lori.
Se pol dar pezzo mistier,
     Un mistier più desperà,
     Sfadigar senza saver
     60Cossa diamberne se fa?
E voressi farlo vu?

[p. 119 modifica]

     Oh, saressi un gran bel tomo!
     Caro fio, penseghe su,
     64E credeghe a un galantomo,
Che ga in odio l'impostura,
     Che ga sempre in boca el cuor.
     Ch'è per vu pien de premura,
     68Pien de stima, e pien d'amor.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Far_el_medico_volè&oldid=52469"