El tropo e 'l tropo poco

by Anton Maria Lamberti

3 El tropo e 'l tropo poco Anton Maria Lamberti de una poesia francese non specificà XVIII Canzonete Indice:Raccolta di poesie in dialetto veneziano 1845.djvu Altra edizion: Il Troppo e il Troppo poco (1817)

Anton Maria Lamberti

El tropo e 'l tropo poco

traduzion de una poesia francese non specificà

XVIII secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

Altra edizion: Il Troppo e il Troppo poco (1817)

EL TROPO E 'L TROPO POCO.

DAL FRANCESE.

Ne la stagion dei bocoli,
     Sul tramontar del dì,
     Sentai soto una pergola
     4Gerimo Nina, e mi;
Mai più l'aveva vista
     Quanto in quel zorno bela;
     Fisso mi gera in ela
     8Disendoghe cussì:
«Quel che ti fa, mia cocola,
     Xe tropo per scherzar,
     Ma tropo poco, nonola,
     12Quando ti vogi amar.
Quele ochiadine tenere
     Che co le mie se vien,
     Fa che 'l mio cuor s'imagini
     16De bisegarte in sen,
Ma de sto dolce ad onta
     Parlar, che 'l cuor me toca
     Oh dio! che la to boca
     20Co quele no convien.
               Quel che ec.

Se voi scazzar da l'anima
     Quel fogo che sofrir
     M'à fato tanti spasemi,
     28Ti ti me 'l sa proibir,
Ma se te digo, cara,
     Sentistu in tel to peto
     Per mi l'istesso afeto?
     32No ti me lo vol dir.
               Quel che ec.

Su quele neve candide
     Se sbrissa la mia man,
     Neve che fa ardentissime
     40Un dio per mi tiran,
No trovo che se opona

     La toa su quel mumento,
     Ma da là un poco sento
     44Cazzarmela lontan.
               Quel che ec.

Qualche coral dai laveri,
     È vero, t'ò robà,
     E ti compassionandome,
     52Robar ti l'à lassà;
Ma no ghe xe stà esempio
     Che da to posta mai
     Un de quei bei corai
     56Ti m'abi regalà.
               Quel che ec.

Ah! Nina, se deciderse
     No vol per mi el to cuor,
     Vien qua, piutosto mazzime,
     64Termina el mio dolor;
Daghe sto premio, ingrata,
     A Toni che te adora,
     Fa che con elo mora
     68El più costante amor.
Decidi, cara cocola,
     Se ti me vol burlar,
     O se xe vero, nonola,
     72Che ti me vogi amar.»
Pietoso el fio de Venere
     Alora s'à mostrà,
     E in t'una bela nuvola
     76Insieme el n'à sarà.
No so se fusse al mondo,
     O pur da quel diviso,
     Ma so che un paradiso
     80Gnente de più no ga.
E ò dito: «La mia cocola,
     Questo no xe scherzar,
     L'è far da seno, nonola,
     84Questo xe vero amar. —
— Si, co un soriso amabile,
     Ma insieme anca baron,
     La dise: mi no dubito,
     88L'è amor, ti ga rason;
Ma el to vantar, perdona,
     Fa che la to Nineta
     Sul muso te ripeta
     92L'istessa to canzon.

Quel che ti à fato, cocolo,
     Xe tropo per scherzar,
     Ma tropo poco, nonolo,
     96Quando ti vogi amar.»